Мыдгæсты уалдзыгон аудинæгтæ
7 апреля 2020 Новости [версия для печати] [читать комментарии] [размер шрифта: a- | А+] [449 просмотров]
Хъæууон цардУалдзæджы, хъарм бонты æрбалæудимæ мыдыбындзытæ ратæхынц æддæмæ æмæ сæумæрайсомæй суанг изæрмæ райдайынц сæ ахсджиаг куыст æххæст кæнын. Уыимæ иумæ мыдгæсты æнæаргъæвгæ куыстытæ дæр сбирæ вæййынц æмæ фæлтæрд мыдгæс сæ сæххæст кæнынмæ бавналы рæстæгыл. Нæ республикæйы дæр ис, мыддарды куыст рапарахат кæныныл чи архайы, ахæмтæ æмæ сын кæддæриддæр вæййы раппæлинаг æнтыстытæ. Уыдон фыццæгтæм хауы Тъбеты хъæуы цæрæг Цхуырбаты Леонид, кæцыйæн алы аз дæр вæййы зæрдæрухсгæнæн фæстиуджытæ. Цхуырбайы фыртæн йæ фыд Георги дæр бирæ мыдыбындзытæ дардта, райста ацы куысты хорз фæлтæрддзинад æмæ йын йæ хъуыддаг ныр та арæхстджынæй дарддæр кæны йæ фырт.
Фæлтæрд мыдгæс куыд зæгъы, афтæмæй мыдгæсæн уалдзæджы бирæ вæййынц йæ аудинæгтæ æмæ сæм хъуамæ рæстæгыл æрдара йæ хъус. Мыдгæс хъуамæ йæ хъусдард аздаха мыдыбындзыты æнæниздзинадмæ, базона, цотæн мадæл бындз ис æви нæй æмæ сын кæд нæ уа, уæд æвæстиатæй хъуамæ бацархайа ног мадыл. Фæзгъæртæ хъуамæ уой сыгъдæг, сæ бынат та — сур. Уымæл куы вæййы, уæд къултыл фæзыны хъуына. Афтæ куы уа, уæд ахæм рамкæты хъæуы баивын. Зындгонд куыд у, афтæмæй мыдыбындзытæ цæрынц бинонгай æмæ сты æртæ хуызы гоймæгтæ: сæ иу у мадæл, цалдæр сæдæйы уалдзæг-сæрдыгон сезоны сты, магуса бындзытæ кæй хонынц, уыдон æмæ иннæтæ та нымад цæуынц кусæг мыдыбындзытыл. Мыдычыргъæды бындзытæ тынг фæкъаддæр вæййынц, фæлæ та сæрды мæйты сæ нымæц схизы. Мадæл бындз у æппæты стырдæр æмæ йæ нысан суанг фæззæгмæ у æйчытæ æфтауын. Æндæр сты сæ хæстæ кусæг мыдыбындзытæн та. Уыдон æххуыс кæнынц мадæл бын-дзæн, хъахъхъæнынц ахстоны, асурынц магуса бындзыты, мыдычыргъæ-ды æнæмæнгхъæуæг температурæйæ ифтонг кæнынц , æххæст кæнынц æппæт куыстытæ æмæ æппæт уыдæт-ты фæрцы бинонты нормалон царды уавæртæ вæййынц æххæст.
Уалдзæджы хъарм бонты мыдгæс хъуамæ базона, мыдыбындзытæ куыд базымæгиуат кодтой, стæй сын цахæм æххуыс хъæудзæн, æппæт уыдæттæ. Кæд чыргъæды 7-8 рамкæйы мыд ис, уæд уый нымад цæуы тыхджыныл, 6 рамкæйы дзы куы уа йедзаг мыд, уæд уый та нымад цæуы астæуккагыл æмæ уымæй къаддæр та нымад у мæл-лæгыл. Зæгъын хъæуы мыдыбындзыты уыныны размæ къухтæ æхсын хъæуы сапонæй, стæй мыдгæсы дарæс дæр хъуамæ уа сыгъдæг. Хъæздыг мыдыбындзыты бинонты мадæл уалдзæджы райдайы æйчытæ æфтауын æмæ фæстæдæр уыцы æйчытæй равзæрынц æвзонг мыдыбындзытæ. Цхуырбаты Леонид куыд амоны, уымæ гæсгæ сын ныртæккæ дæттын хъæуы сæ райрæзты тыххæй апимакс. Стыр зиан сын хæссы джыбыниз, нал сæ фæуадзы размæ цæуын, æрлæууынц сæ кусынæй. Цæмæй уыцы низæй хызт уой, уый тыххæй сын дæттын хъæуы биварол, кæнæ та аквафло, хостæ цæттæ кæныны инструкцитæ сты семæ. Уымæй дарддæр ма Цхуырбайы фырт фæдзæхсы мыдгæсты, цæмæй къæртайы хъармдзинад уадзой, уымæн æмæ нырма боныгъæд кæны раив-баив. Ацафон мыдыбындзытæ чыргъæдмæ фылдæр хæссынц дидинæджы рыг, куыд нектар, афтæ уыцы рыг дæр æнæ-мæнгхъæуæг у къуыртт хъомыл кæнынæн. Уыцы рыг мыды рамкæты куы вæййы, уæд уый хуыйны сагъæ. Уазал бонты чыргъæдты батæхæнтæ фæхъæуы сыхгæнын, цæмæй æддæмæ ма тæхой æмæ ма сæфой быдырты. Иудзырдæй, мыдгæсты куыстытæ дзæвгар сты æмæ сæ алчи дæр хъуамæ æххæст кæна афоныл æмæ гъæдджынæй, уæд фæззæджы сисдзæн дзæвгар мыд.
ХУЫБИАТЫ Никъала
Источник - Газета Хурзарин.
Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.
Мы рекомендуем Вам зарегистрироваться либо войти на сайт под своим именем.
Комментарии (0)
-
-
2 / 5
-
Информация
Посетители, находящиеся в группе Гости, не могут оставлять комментарии к данной публикации.
Нашли ошибку?