Ахуыргæнæг. Кадджын у йæ ном кæддæриддæр. Алы адæймагæн дæр стыр бынат ахсы йæ зæрдæйы йе стыр куысты руаджы. 2-æм февралы нæ горæты скъола-интернаты актон залы уагъд цыд мадзал, цыран хорзæхджын æрцыдысты горæт Цхинвалы скъолаты хуыздæр къласгæстæ. Ардæм æрбацыдысты РХИ-йы Ахуырад, зонад æмæ фæсивæдон политикæйы фæдыл министр Плиты Риммæ, йæ хæдивæг Джиоты Замирæ, горæты администрацийы ахуыры хайады гæс Джиоты Агуындæ, скъолайы директортæ, ахуыргæнджытæ æмæ ахуырады æндæр бæрнон кусджытæ.
Æрæмбырдуæвджыты раз раныхас кодта, бузныг æмæ арфæйы ныхæстæ загъта Ахуырады министры хæдивæг Джиоты Замирæ.
- Абон у диссаджы бон. Уымæн æмæ хорзæхджын кæнæм скъолаты хуыздæр къласгæсты. Арæх хорзæхджын æрцæуынц æндæр æмæ æндæр категориты ахуыр-гæнджытæ. Фæлæ нын ацы хъуыддаг саразын никуы бантыст. Уымæ гæсгæ фарон республикон программæмæ хаст æрцыд ахæм мадзал ауадзын, кæцымæ гæсгæ хуыздæр къласгæстæ хъуамæ хорзæхджын æрцыдаиккой æхцайы премитæ æмæ Арфæйы фыстæджытæй. Зæрдæбынæй уын зæгъын бузныг уе стыр куысты тыххæй. Сымах не скъолаты цæсгомджынæй æххæст кæнут не 'рыгон паддзахады, нæ министрады, ахуыргæнинæгты ныййарджыты раз вазыгджын хæс. Мах фæнды, цæмæй нæ сывæллæттæ скъолайы исой бындурон зонындзинæдтæ. Уыимæ ма хъуамæ уой хæрзæгъдау уды хицæуттæ дæр. Аргъ кæнын зоной нæ фыдæлты æгъдæуттæн. Аккаг фæсивæд схъомыл кæнынæн бирæ тых хардз кæнын хъæуы. Кæд æмæ нæ куысты цухдзинæдтæ вæййы, уæддæр сæ аиуварс кæныныл хъæуы æнæрынцойæ кусын.

Вæййы афтæ, æмæ нæ фæсивæдæй иуæй-иутæ æнæуаг хъуыддæгтыл бафтынц. Фæлæ уæ иузæрдион куысты руаджы раст фæндагыл слæууынц æмæ уын ноджыдæр стыр бузныг.
Фæнды ма мæ банысан кæнын, уый æмæ не 'хсæнады цы æвзæр хъуыддæгтæ æрцæуы, уыдонæй нæ фæсивæды хъæуы бахизын. Фæлæ, хъыгагæн, не 'хсæн ахæмтæ дæр разыны æмæ уазал цæстæй фæкæсынц сæ хъомылгæнинæгты уагмæ.
Мæнæн ацы бонты мæ зæрдæ тынг фæрыст: æрæджы не 'хсæнады æвирхъау хабар æрцыд: цхинвайлаг ацæргæ лæджы онггай мардæй ссардæуыд. Марды къамтæ скъоладзауты къухмæ бафтыдысты, сæ телефонты апырх сты. Цавæр æнкъарæнтимæ сæм кастысты нæ сабитæ, уый нæ зонын, фæлæ сæм чи фæхæццæ кодта уыцы кадыртæ? Уый тыххæй та хъæуы фæсивæдимæ стыр куыст кæнын.
Нæ мæ фæндыд ахæм рæсугъд мадзалы æнкъард цаутыл дзурын, фæлæ хъомыладон куысты æнцон фарстатæ нæй.
Уый фæстæ сценæмæ радгай хуынд цыдысты 49 ахуыргæнæджы æмæ хъомыладон процессы архайæджы, ома, сывæллæтты сфæлдыстадон галуаны кусджытæ, ахуырадон организациты минæвæрттæ. Алкæй дæр сæ схорзæхджын кодтой Арфæйы фыстæгæй.
Кæронбæттæны арфæйы æмæ бузныджы ныхæстæ загътой РХИ-йы Ахуырад, зонад æмæ фæсивæдон политикæйы министр Плиты Риммæ æмæ горæты администрацийы ахуыры хайады гæс Джиоты Агуындæ. Ахуыргæнджыты номæй та раарфæ кодта 2-æм скъолайы уырыссаг æвзаг æмæ литературæйы ахуыргæнæг Къæбысты Дзерассæ.

ТУАТЫ Ларисæ